Юнуси Имомназар

2-й агрегат Рогунской ГЭС

2019-09-10

Свет в каждый дом. В Таджикистане в день 28-й годовщины независимости президент Эмомали Рахмон запустил второй агрегат Рогунской ГЭС. На церемонии была и корреспондент телеканала «МИР 24» Вера Исмаилова.

Сегодня в Таджикистане двойной праздник – День государственной независимости и запуск второго агрегата Рогунской гидроэлектростанции. На ГЭС собрались тысячи людей: это члены правительства, представители интеллигенции, сами строители, молодежь и ветераны.

Рахмон осмотрел тоннели, плотину и строительные участки. На знакомство с работой всей гидроэлектростанции президенту потребовалось около трех часов. Затем он запустил в эксплуатацию второй агрегат. Всего их будет шесть, мощность каждого – 600 мегаватт. В год «Рогун» будет вырабатывать более 17 миллиардов кВт/ч электроэнергии.

Хирмани донишҳо

2019-09-10

ХИРМАНИ ПУРБОРИ ДОНИШҲО

Имсол панҷ нафар аз хонаводаи мо, яъне набераҳои Бобои Имомназар ба донишгоҳҳо довталаб буданд. Хурду калон бо ҳаяҷони бисёр ва дилҳои беқарор поёни имтиҳонотро интизорӣ мекашидем. Ниҳоят, ҳар чӣ дар дег буд ба калбез омад!

Боиси хушҳолӣ ва ифтихори мост, ки ҳамаи фарзандонамон донишҷӯ шуданд ва ҳар яке бо грант (таҳсили маҷҷонӣ аз маҳалли будҷаи давлатӣ) ба донишгоҳҳои интихобкардаи худ дохил шуд. Агарчи муҳобот аст, ҳоло бо дили пур аз ғуруру сарафрозӣ додарону хоҳарони донишҷӯямро номбар мекунам ва бо орзуи фатҳи қуллаҳои баландтари илму хирад ба ҳар яки онҳо дастёбӣ ба курсии донишҷӯйиро аз сидқи дил табрику таҳният мегӯям. Боракаллоҳ!

1. Хушнуди Юсуф Имомназаров – донишҷӯйи факултаи неруи ҳароратӣ ва муҳандисии мошинолоти ҳароратии Донишгоҳи энергетикаи Маскав дар Тошканд.

2. Фарангиси Ёқуб Имомназарова – донишҷӯйи факултаи фановариҳои мошинолот ва таҷҳизоти Донишгоҳи бофандагӣ ва санъати сабуки Тошканд.

3. Имомназари Олим Имомназаров – донишҷӯйи факултаи таҷҳизот ва сомонаи радиоэлектроникии Донишгоҳи политекники Дизах.

4. Шаҳриёри Нуралӣ Қӯрғонов (писари хоҳарамон Холбика) – донишҷӯйи Донишкадаи муҳандисӣ- физикии Донишгоҳи миллии пажӯҳишҳои ҳастаии Маскав (МИФИ) дар Тошканд.

5. Покиза Бакриева (духтари хоҳарамон Муътабар, абераи Бобои Имомназар) – донишҷӯйи факултаи фановариҳои мошинсозӣ ва автоматикаи санъати мошинсозии Донишгоҳи давлатии куҳшиносии шаҳри Навоӣ.

Даргузашти Азиза

2018-10-16

Овозхони хушадо Азиза Ниёзматова дар синни 46 солагӣ ба иллати бемории саратон аз ин олам даргузашт. Ин зебосанами хоразмӣ як сол пеш ба нияти шифо ёфтан ба Ҳиндустон рафта буд, аммо муолиҷаҳои гирифтааш суд набахшид. Як ҳафта дар Маркази ҷумҳурии саратоншиносӣ хобида, ноумед ба диёри худ Хоразм баргашт ва 15 октябр ҷон ба Ҷаббор таслим намуд.

Сароянда 27 январи соли 1972 зода шудааст, се духтар ва як писар дорад. Агарчи бештар оҳангҳои ӯзбакию хоразмӣ месуруд, дар ҷашну арӯсиҳои тоҷикон низ зиёд ҳунарнамоӣ мекард ва таронаҳои тоҷикиро бо маҳорат ба истимоъ мерасонд.

Яке аз маъруфтарин оҳангҳои Азиза бо ин мисраъҳо оғоз мешавад, ки хурду калон онро замзама мекунанд:

Кишмиш қўшиб бол бераман – есангиз.

Юрагимдан жой бераман – келсангиз.

Новвот қўшиб чой бераман – ичсангиз.

Юрагимдан жой бераман – келсангиз...

Худованди мутаъол ӯро биёмурзад, рӯҳаш шоду ҷаннати барин ҷояш бод.

Зодрӯзи Шоқаҳҳор Муҳаббатзод (гузориш аз таърихи 04.07.2018)

2018-09-30

Бо арзи табрику таҳният (гузориш аз таърихи 04.07.2018)

Шоқаҳҳор Муҳаббатзоди истаравшанӣ – бародари омӯзгорон ва ҳунарпешагони шоистаи Тоҷикистон Шоҳсалим (рӯҳашон шод бод) ва Тошбой Муҳаббатовҳо аст. Ӯ ҳанӯз дар замони шӯравии собиқ ба Тошкандшаҳр омада, муқими доимӣ шуда, фаъолияти корӣ ва ҷамъиятии худро дар бахши рӯзноманигорӣ оғоз намудааст.

Забондонӣ, дониши васеъ ва истеъдоди фавқулода баланди Шоқаҳҳор Салимов (Муҳаббатзод) буда, ки ӯ дар идораҷоти гуногуни рӯзномаю маҷаллаҳо, радио ва телевизион, Ожонсӣ ва нашриётҳо фаъолият карда, дар байни ому хос маъруфият касб мекунад. Ӯ зиндагии пуртазоди Афғонистонро бо чашми худ дидааст, дар Ӯзбакистон барои роҳандозии зиндагии пурбори маънавии тоҷикон, таҳкими равобити дӯстӣ ва ҳамгароии халқҳои ҳамсояи Осиёи Миёна талошҳои бесобиқа анҷом додааст.

Дирӯз узви Иттиҳоди журналистони Ӯзбекистон, ба гуфтаи ҳозирин, яке аз пулҳои боэътимоди равобити дӯстонаи халқҳои тоҷику ӯзбак Шоқаҳҳор Салимов бо дӯсту бародарон, ҳамкорон, мутарҷимин, рӯзноманигорон ва ҳаводорони худ ҷашни шастумин солгардашро таҷлил кард. Дар ин нишасти пурҷозиба ба корҳои рӯзноманигорӣ, мутарҷимӣ, иҷтимоии мавсуф баҳои баланд дода шуд ва ҳамроҳ бо эътои подошию ҳадяҳои мухталиф овозхонҳо Абдухалил, Гулчеҳрабону ва бародари азизашон Тошбой дили ҳозиринро бо оҳангу таронаҳои дилнишин шодоб сохтанд.

Худованд ба Шоқаҳҳори азизу гиромӣ ва серкор, ба ин сарвари хонаводае, ки ҳамаашон (Кароматапа (ҳамсари эшон), Шуҳрату Пайрав ва Малика) донишгоҳро бо дипломи сурх тамом кардаанд ва пас аз саъю заҳамоти фаровон ба зиндагии мураффаҳ даст ёфтаанд, умри дароз диҳад ва комгорию лаҳзаҳои ширини ҳаётро насибашон гардонад

Шоми дӯстӣ (гузориш аз таърихи 17.08.2018)

2018-09-30

“Шоми дӯстӣ”-и фаромӯшнопазир

Рӯзи 17-уми август дар кохи анҷуманҳои Тошканд дидорбинии сарварони ду кишвар – Шавкат Мирзиёев ва Эмомалӣ Раҳмон бо намояндагони пешсафи қишрҳои гуногуни иҷтимоӣ баргузор шуд ва ба шарафи ин вохӯрӣ як барномаи ҳунарии густурда ба забонҳои тоҷикию ӯзбакӣ доир гардид. Аз ин дидору гирдиҳамоӣ он чиз масарратангез буд, ки ду миллати ҳамсоя омодаанд ба ҳамдигар дасти дӯстӣ диҳанду дари ҳар гуна бандгоҳҳои ҳамкорӣ ва ҳамзистиро боз кунанд.
Бо даъвати Созмони миллию фарҳангии ҷумҳурӣ банда низ дар ин барномаи муштараки “Шоми дӯстӣ” ширкат варзидам ва гузашта аз он, ки то ҷое роҳат бурда бошам, чанд маврид бароям шигифтангез буду то ҳол дар ёдам ҳаст ва ба гумон аст, ки он лаҳазотро фаромӯш кунам.
Яке аз шартҳои ин ҷамъомад он буд, ки ҳама мебоист бо як фӯрм – шиму костюми сиёҳ, пероҳани сапед ва тавқ бар гардан меомаданд. Мани бехабар аз ин гуна дархост ҳамаро доштам ба ҷуз костюм. Таваккал, дар канори дигарон ба назди даромадгоҳ омадам. Нигаҳбоне, ки калтаки ҳушманд ба даст дошт, баробари дидани ман амр кард:
- Бародар, ба ту иҷозаи вуруд нест, бояд костюм бипӯшӣ!
Ба ҷуз пас гаштан чораи дигаре надоштам, ҳар гуна хоҳишу илтимос бефоида буд. То шурӯъи барнома ҳанӯз вақт доштам. Азбаски манзилам хеле дур буд, дар маҳалли кор нуҳ-даҳ дари ҳамсоягонро кӯфта, билахира аз як марди ӯруси бадмаст костюмеро пайдо кардам ва бо шитоб ба кохи анҷуман баргаштам. Агарчи костюм ду-се сойз бузургтару бо ранги мутамоиз аз шимам буд, бе мамониат дохили толор шудам ва ниҳоят... обу арақи сару рӯю гарданамро беист поккунон сари ҷойи худ, ки хушбахтона, дар як гӯшаи дурдасти толор буд, нишастам. Аз Худо мехостам, дурбинҳои аккосиву филмбардорӣ ба суроғи ман наоянд...
Ҳамин ки суханронии ду раисҷумҳур ва дар идома баромади овозхонҳо оғоз шуд, фаҳмидам, ки хастагии аз ҷустуҷӯйи костюм ба бор омада ҳеҷ гапе набудааст. Хоҳ бовар кунед, хоҳ не, то охири ин барномаи аҷибу ғариб аз кафкӯбиҳои давомдор кафи дастҳоям обила зад! Кош дар ҷойи нишаст каф мезадам, ҳар гоҳ баробари аҳли толор ба по хеста дастҳоро боло бардошта бозувонро алвонҷ дода “қарсак” мезадем. Ин кам буд магар, дар оғоз чанд бор босани бечораро ба таҳкунӣ зада гирифтам. Гап дар сари он, ки ҳар гоҳ барои кафкӯбӣ ба по мехестем, таҳкунии сандалӣ низ диккас зада рост мешуд ва мани одатнакарда фаромӯш мекардам онро ба поин хобонида баъд нишинам...
Аз сӯйи дигар, таоруфҳои болохонадори духтари барандаи тоҷикистонӣ ҳамаро “моту мабҳут” кард. Э боракаллоҳи вай, ки ба изофаи “раисҷумҳур” аз гуфтани пешвои миллату ҷаноби олию муҳтарамҳо ҳеҷ хаста нашуд-е! Ба шарофати ӯ президенти Ӯзбекистон низ чандин бор ҷаноби олӣ шуд...
Вале, таркиби гурӯҳи ҳунарии аз Тоҷикистон омада ҳамаи моро лол кард! Мо ба ин хулоса омадем, ки дар Тоҷикистони азиз маъруфтарину пешсафтарин ҳунармандон ҳамон Саидқул Билолову Давлатманд Холову Муҳаммадрофеи Каромутулло ва чанд тани дигар ҳастанд, ки агар ёдатон бошад чанд моҳ пеш айнан ҳамонҳо ба Тошканд ташриф оварда буданд... Ҳунарпешагоне мисли Афзалшоҳу Нигинаву Ҷӯрабеку ... шояд ба ин гуна барномаҳои бонуфуз муносиб нестанд?
Бо ин ҳама, зинда бодо дӯстӣ, ҳамгароӣ, ҳамдиливу ҳамнафасӣ! Ба вижа, амалкарди ду раисҷумҳур, ки қарордоди ҳамкории стратегӣ ва бисту шаш санади муҳимро ба имзо расониданд, қобили таҳсин аст.

Тақдири тоҷикон

2018-09-30

Лутфи давлатдорони тоҷик (гузориш аз таърихи 31.08.2018)

Дар канори сиёсатмадорон қадр гардидани равшанфикрон боиси дилхушӣ ва умедворӣ ба ояндаи нек аст.
Ба нишони «Дӯстӣ» сазовор шудани инсонҳои хоксору одӣ ва дӯстдоштаи миллат – шоир Паймон (Тӯхтамиш Тӯхтаев), устоди донишгоҳ, раиси Маркази миллӣ-фарҳангии тоҷикони Самарқанд Абдуваҳҳоб Воҳидов, устоди Донишгоҳи Бухоро Таваккал Чориев аз сӯйи раёсати кишвари Тоҷикистон дилҳоро ба зиндагӣ гарм сохт. Ва Ҳунарпешаи мардумии Тоҷикистон гардидани зани ҳунарманди тоҷик Матлуба Дадабоева, ки тамоми умр барои воло нигаҳ доштани ҳунару фарҳанги тоҷик талош кардааст, аз воқеънигарии давлатдори Тоҷикистони азиз гувоҳӣ медиҳад.
Ҷоизаҳо муборак, ҳаммиллатони ҳунарманд!

1-уми сентябр - Рӯзи Истиқлол

2018-09-30

Ба мардуми озодихоҳ Истиқлол муборак!

Садду бандҳои марз аз ҳам пошида шуд, мардум дасти дӯстиву ҳамзистӣ ба якдигар дароз карданд, ҳазор-ҳазор хонаводаи хешу ошно ба дидори ҳам расиданд, миллати тоҷик, ба вижа, дар сарзамини бостонию аҷдодии худ, ки онро аз ду ҷониб рӯдхонаҳои босафои Ому ва Сир ба оғӯш мегиранд, нафаси осуда кашид.

Имсол 27-умин солгарди ҷашни истиқлоли Ӯзбекистон бо ин гуна вафою сафои рӯзгор тавъам омад ва пиру барно ба ояндаи нек бо нигоҳи умедвор дида андӯхтанд. Эй кош, дӯстӣ бошаду сулҳу меҳру муҳаббати инсонҳо ва калиди муҳркушои ҳар гуна қадру қимати ҳастӣ ва бобҳои маънавию фарҳангии аз дастрафта!

Имрӯз, 1-уми сентябр ҷашни Истиқлоли Ӯзбекистонро намояндагони даҳҳо миллату қавми муқими кишвар дар назди бинои Созмони миллию фарҳангии ҷумҳурӣ бо ироаи дастурхонҳои густурда, намоиши ҳунарҳои миллӣ, рақсу бозӣ ва овозхониҳои мардумӣ истиқбол намуданд. Миллати тоҷикро дар ин ҷашн Маркази миллию фарҳангии ҷумҳурӣ ва шаҳри Тошканд – Шарофатбону ва Маъруф Отахонзода бо гӯшаи идона, тазйиноти ҳунарҳои мардумӣ, шириниҷот, меваҳои тару тоза рӯнамоӣ карданд ва дар барномаи ҳунарӣ ҳам бо овози Гулнора Ҳамдамова оҳангҳои тоҷикӣ садо дод.

Саҳни бинои Созмони миллию фарҳангии ҷумҳурӣ бо роҳравҳои музоикшуда, қитъаҳои гулпӯшу дарахтҳои пасту баланди ороишӣ, фаввораи бузурги “раққосу ҷилвагар” ва (намедонам барои чӣ) бо муҷассамаи шоири рус Пушкин зеб дорад...

Розу ниёзи дӯстӣ

2018-06-21

“Мо соатҳои дароз метавонем дар бораи дӯстию ҳамдилӣ гап занем, вале акнун фурсат расидааст, ки ба корҳои амалӣ гузарем, дасти дӯстиро бо дастовардҳои дардхури миллатҳо ба ҳамдигар расонем...” – мегӯяд Ҷамшед Пиримов, шоири ӯзбекзабони тоҷикистонӣ.

Дирӯз, 20 июни соли 2018, дар студияи наворбардории шабакаи телевизионии “Ӯзбекистон-24” дар Тошканд бо меҳмонони тоҷикистонӣ – намояндагони фаъоли Созмони миллии фарҳангии ӯзбекони вилояти Суғд, ки бо сарварии шоиру рӯзноманигори шинохтаи ӯзбекзабон сармуҳаррири маҷаллаи “Шарқнома” Ҷамшед Пиримов ташриф оварда буданд, як нишасти гуворо ва хотирмон доир гардид. Дар ин вохӯрӣ равшанфикрони марказҳои мухталифи миллӣ-фарҳангии Ӯзбекистон, кормандони рӯзномаи ҷумҳурии “Овози тоҷик” бо раҳбарии Шерпӯлод Вакилов ширкат варзида, бо ҳамтоёни тоҷикистонии худ дар мавзӯи дӯстию ҳамгароӣ, имконоти мавҷуди иҷтимоиву маънавӣ дар кишварҳои худ, равобити адабиву ҳунарӣ суҳбатҳои гарму дилнишин ва баҳсу мунозираҳои судманд анҷом доданд.

Даргузашти устод Мӯъмин Қаноат

2018-05-18

Имрӯз, 18 майи соли 2018 устоди шеъру сухан Мӯъмин Қаноат ба дорулбақо реҳлат намуданд. Ҷояшон ҷаннат, рӯҳашон шод, оқибаташон ба хайр бод.

"Даргузашти Устод Мӯъмин Қаноат, номбардори миллат, чеҳраи дурахшони сухан, чомасарои қаҳрамонӣ ва тамкину шикебоии тоҷикон, раҳкушо ва устоди як насли адибон, рӯшанфикри асил ва шуҷоъро ба ҳамаи ёрон сӯгворӣ мегӯям. Бо рафтани ӯ як қарни фарҳанги тоҷик ба поён расид. Мероси ӯ ва дигарон, кош, заминаи қарни дигари рахшандатаре гардад! Равонаш шод ва хонаи вопасинаш пурнур бод!"(Салим Аюбзод)

Зодрӯзи Хайём

2018-05-18

Нокарда гунаҳ дар ин ҷаҳон кист? Бигӯ!

В-он кас, ки гунаҳ накард, чун зист? Бигӯ!

Ман бад кунаму ту бад мукофот диҳӣ,

Пас, фарқ миёни ману ту чист? Бигӯ!

Дарҳол донистед, ки ин рубоӣ моли кист! Оре, бе шубҳа, рубоиёте амсоли ин ба хомаи Ҳаким Умари Хайёми Нишопурӣ тааллуқ дорад, ки айнан ҳамин рӯз – 18 майи соли 1049 ( 28 урдибиҳишти соли 428 ҳиҷрии шамсӣ), зодрӯзи ин донишманди накӯном аст.

Орзу дорам аҳли форсизабони ҷаҳон бо чунин фарзанди фарзона боз ҳам бештар бинозаду биболад ва фарзандоне мисли ӯ ба ҳастии рӯшан биёварад! Ин рӯзи нек ба ҳар як инсони хушнияту донишпарвару фарҳангдӯст хуҷаста бод!

ناکرده گنه در این جهان کیست بگو

آن کس که گنه نکرد چون زیست بگو

من بد کنم و تو بد مکافات دهی

پس فرق میان من و تو چیست بگو!

امروز، 18 ماه مه، زادروز حکیم عمر خیام نشاپوریست که مصادف با 28 اردیبهشت هجری شمسی باشد. با عرض تبریک و خجسته باد به یکایک انسان های خوش نیت و دانش پرور و فرهنگ دوست، آرزو دارم اهل فارسی زبان جهان با همچنین فرزند فرزانه بیشتر و بیشتر بنازند و ببالند و فرزندانی مثل او به هستی روشن اعطا کنند!

Даргузашти устод Бозор Собир

2018-05-01

Дар ҳаду сарҳадшиносии ҷаҳон,

Сарҳади тоҷик забони тоҷик аст.

То забон дорад, ватандор аст ӯ,

То забондор аст, бисёр аст ӯ!

Даргузашти муаллифи ин сатрҳои обдору лоязолӣ, шоири бузургу андешаманди тоҷик БОЗОР СОБИРро ба аҳли хонаводааш, ба ҳар як тоҷики адабдӯсту шеърпарвар, ба ҳар як ошиқи ҳастиву зебоиҳои ҳастӣ тасаллият мегӯем. Равони устоди сухан шод боду охираташ обод.

در حد و سرحدشناسی جهان

سرحد تاجیک زبان تاجیک است.

تا زبان دارد، وطندار است او

تا زباندار است، بسیار است او!

درگذشت سراینده این مصرعات آبدار و لایزالی، شاعر بزرگ و اندیشه مند تاجیک بازار صابررا به اهل خانواده اش، به هر یک تاجیک ادب دوست و شعرپرور، به هر یک عاشق هستی و زیبایی های هستی تسلیت می گوییم. روان استاد سخن شاد باد و آخرتش آباد.

Ҳамойиши шеъри тоҷик

2018-02-16

Ҳамойиши фарҳангӣ таҳти мавзӯи “Шеър – пайвандгари миллатҳо” дар Тошканд

27 январи соли 2018 дар кохи Маркази байналмилалии фарҳанги Ӯзбакистон ҳамойиши фарҳангии тоҷикони ҷумҳурӣ дар мавзӯи “Шеър – пайвандгари миллатҳо” баргузор шуд.

Дар ин нишаст шоиру нависандагон, асотиду омӯзгорон, равшанфикрон ва дӯстдорони каломи ноби тоҷикӣ аз гӯшаю канори мухталифи кишвар, минҷумла, аз шаҳру навоҳии устонҳои Тошканд, Самарқанд, Сурхондарё, Фарғона ширкат варзиданд. Ҳамойиши шеъру шоирӣ бо сухани муқаддимавии Шарофатбону Ҷӯразода – раиси Маркази миллӣ-фарҳангии тоҷикони ҷумҳурӣ оғоз ёфт ва раҳбарию раёсати он аз сӯйи шоир Ҷаъфари Муҳаммад сурат гирифт.

Ҳозирин бо беҳтарин намунаҳои шеъри муосири форсӣ-тоҷикии Ӯзбакистон ошно шуданд. Шоирони шинохта, аз қабили, Абдулло Субҳон, Парисо, Дилшода Фарҳодзод, Асадуллоҳ Шукурзода намунаҳоеро аз эҷодиёти худ ва аз дурдонаҳои назми тоҷикӣ-форсӣ қироат карданд. Инчунин суханронӣ ва шеъргӯйии шоиру шоирпешагони хурду куҳансол, аз қабили Расулбеки Аҳмадзод, Қутбиддин Мирзоматов, Аҳмад Назар, Исмат Ҳалими Деҳнавй, Шуҳрати Бобоҷон, Абдуҷалол Қодирӣ, Аслиддин Қамарзода, Ҳасани Сулаймонӣ, ҷавонтарин эҷодкорон Фарзона, Ҳадиса ва Азиза хеле шуниданӣ ва қобили таҳсин буд. Аз мунаққидони адабиёт, ки мутаассифона, ҳоло дар байни мо каманд, Абдулқайюми Ҳасанзод низ ибрози ақида кард. Ба ҳамойиш оҳангу сурудҳои дилнишин бо садои Раҳимҷон, Бахтиёр ва рақсҳои дилрабои тоҷикдухтарон, ки либосу оройиши миллӣ доштанд, саҳнаоройии гурӯҳи фолклории "Навобод” ҳусни бештар ато намуд.

Бузургтарин оши палав

2017-09-09

Дирӯз дар чаҳорчӯби ҷашнвораи миллии “Ӯзбегим” дар шаҳри Тошканд ба вазни 7360 килограмм оши палав омода карда шуд, ки онро намояндагони китоби рекордҳои Гиннес ёддошт намуданд. Дар ин хусус Ричар Стенинг - намояндаи Guinness World Records изҳори назар кард.

Барои омода кардани ош 1,5 тонна гӯшти гов, 400 кг гӯшти гӯсфанд, 220 кг дунба, 2,7 тонна сабзӣ, 220 кг пиёз, 440 литр равғани хӯрокӣ ва 57 кг намак масраф шудааст. Ҳамчунин маводи дигар ва зираворӣ, ба монанди нахӯд, мавиз, зира, зардчӯба, мурчи сиёҳ ба кор рафтааст. Оши мазкурро 50 нафар ошпаз аз тамоми кишвар тайи муддати шаш соат пухта гирифтаанд. Деги махсуси ошро муҷтамеи оҳансозии шаҳри Олмалиқ рехтагарӣ кардааст, ки вазни хоси он 7,07 тонна ва қутраш 4,2 метр мебошад ва зарфияти он наздик ба 8000 литр аст.

Оши палавро асосан ба ятимхонаҳо ва осойишгоҳҳои пирон тақисм кардаанд.

футбол

2017-09-06

Ниҳоят, тими мунтахаби футболи Ӯзбакистон ба тамоми саъю талошҳои бесамари худ дар остонаи уруҷ ба плей-офф ва мусобиқаи ҷаҳонии футбол, ки соли 2018 дар Русия баргузор хоҳад шуд, хотима бахшид. Барномарезиҳои чошу пареши Бобояни номуайян натиҷаи дилхоҳ надод ва бори дигар кишвари намояндаи Осиёи Миёнаро аз боздиди саҳнаҳои мусобиқоти ҷаҳонӣ маҳрум сохт.

Дирӯз бозии навбатии тими Ӯзбакистон ва Куриёи Ҷанубӣ дар варзишгоҳи “Бунёдкор”-и Тошканд ба вуқӯъ пайваст ва бо ҳисоби мусовии 0:0 ба поён расид. Дар ин гурӯҳ бозии Эрону Сурия низ ба амал омад ва бо ҳисоби мусовии 2:2 анҷом пазируфт, ки бо бартарии голҳо Сурия ба плей-офф роҳхат гирифт ва аз ин шонс Ӯзбакистонро бенасиб кард.

Дар поёни бозӣ беҳтарин футболбози Ӯзбакистон – Одил Аҳмадов аз хиҷолат дар пеши тамошобинон гиря кард...

Хабарҳои кӯтоҳ

2017-08-26

Чанд хабари кӯтоҳ, ки сари вақт аз гуфтан дасткӯтаҳӣ кардаам:

02.08.2017 – Арӯсии хоҳарҷонам Шабнам духтари Ёқуб баргузор шуд. Вайро ба Носир писари Абдухалели Орзумурод додем.

12.08.2017 – Арӯсии писари дӯсту ҳамсинфам Нурмурод дар шаҳри Гулистон баргузор шуд. Ба писараш духтари Асрори Ҷӯра Мирзо – Зулфизарро келин кард.

17.08.2017 – Арӯсии духтари ҳамсинфам Турсуни Файзӣ буд, ки бо Ҳазратака Кийиков (Сирдарё) қудо шуд.

20.08.2017 – Арӯсии писари дӯсту ҳамсинфам Шавкатҷон дар тӯйхонаи “Ӯзбегим”-и шаҳри Навоӣ баргузор шуд. Меҳрангез духтари ҳамдеҳагонам Фозилу Лутфияро ба занӣ гирифт.

22.08.2017 – Ҳамдеҳаам, бародари азиз Аслони Эгам бо сактаи мағз аз олам даргузашт. Ҷояш ҷаннат бод!

Моҳи Рамазон расид!

2017-05-27

Имрӯз 27 майи соли 2017, мутобиқ бо 6 хурдоди соли 1396 шамсӣ ва 1 рамазони соли 1438 қамарӣ, оғози яке аз фароизи поку муқаддаси дини Ислом – рӯзадорӣ.

Рӯзадорӣ дар моҳи мубораки Рамазон сурат мегирад ва “моҳи Рамазон моҳе аст, ки Қуръон барои ҳидояти инсонҳо дар он нозил шудааст”.

Паёмбари акрам дар бораи моҳи Рамазон мефармояд: “Эй мардум! Моҳи Худо бо баракату раҳмату мағфират ба шумо рӯй оварад, моҳе, ки аз ҳама моҳҳо бартару рӯзҳояш бар ҳама рӯзҳо ва шабҳояш бар ҳама шабҳо ... бартар аст. Моҳест, ки шумо дар он ба меҳмонии Худо даъват шуда ва мавриди лутфи ӯ қарор гирифтаед, нафасҳои шумо дар он тасбеҳу хобатон дар он ибодат, амалатон дар он мақбул ва дуоятон дар он мустаҷоб аст...”.

Рамазон дар луғат аз “рамзаъ”( رَمْضَاء) ба маънои сахтии гармо, шиддати ҳарорат гирифта шуда ва ба маънои сӯзонидан мебошад. Ва бино ба фармудаи Расули акрам, “моҳи Рамазон ба ин ном хонда шудааст, зеро гуноҳонро месӯзонад”.

Кош дар ин Рамазон лоиқи дидор шавам,

Саҳаре бо назари лутфи ту бедор шавам.

Кош миннат бигузорӣ ба сарам, “Маҳдии ҷон”,

То ки ҳамсуфраи ту лаҳзаи ифтор шавам.

Аз торих

2017-05-06

Дар оғоз чунин будааст:

“Қутайба бини Муслим масҷиди ҷомеъ бино кард, андар ҳисори Бухоро дар соли 94 (713 мел.). Ва он мавзеъ бутхона буд аҳли Бухороро. Фармуд, то ҳар одина (рӯзи ҷумъа) дар он ҷо ҷамъ шудандӣ. Чунонки, ҳар одина мунодӣ фармудӣ (нидо мезад): “Ҳар ки ба намози одина ҳозир шавад, ду дирам (сиккаи нуқра) бидиҳам”. Ва мардумони Бухоро ба аввали ислом дар намоз Қуръон ба порсӣ хондандӣ ва арабӣ натавонистӣ омухтан...” (Муҳаммад Наршахӣ, “Торихи Бухоро”).

در آغاز چنین بده:

ﻗﺘﻴﺒﺔ ﺑﻦ ﻣﺴﻠﻢ ﻣﺴﺠﺪ ﺟﺎﻣﻊ ﺑﻨﺎ ﻛﺮﺩ، ﺍﻧﺪﺭ ﺣﺼﺎﺭ ﺑﺨﺎﺭﺍ ﺑﻪ ﺳﺎﻝ ﻧﻮﺩ ﻭ ﭼﻬﺎﺭ، ﻭ ﺁﻥ ﻣﻮﺿﻊ ﺑﺘﺨﺎﻧﻪ ﺑﻮﺩ ﻣﺮ ﺍﻫﻞ ﺑﺨﺎﺭﺍرا. ﻓﺮﻣﻮﺩ ﺗﺎ ﻫﺮ ﺁﺩﻳﻨﻪ ﺩﺭ ﺁﻧﺠﺎ ﺟﻤﻊ ﺷﺪﻧﺪﻯ، ﭼﻨﺎﻧﻜﻪ ﻫﺮ ﺁﺩﻳﻨﻪ ﻣﻨﺎﺩﻯ ﻓﺮﻣﻮﺩﻯ، ﻫﺮ ﻛﻪ ﺑﻪ ﻧﻤﺎﺯ ﺁﺩﻳﻨﻪ ﺣﺎﺿﺮ ﺷﻮﺩ، ﺩﻭ ﺩﺭﻡ ﺑﺪﻫﻢ ﻭ ﻣﺮﺩﻣﺎﻥ ﺑﺨﺎﺭﺍ ﺑﻪ ﺍﻭﻝ ﺍﺳﻼﻡ ﺩﺭ ﻧﻤﺎﺯ ﻗﺮﺁﻥ ﺑﻪ ﭘﺎﺭﺳﻰ ﺧﻮﺍﻧﺪﻧﺪﻯ ﻭ ﻋﺮﺑﻰ ﻧﺘﻮﺍﻧﺴﺘﻨﺪﻯ ﺁﻣﻮﺧﺘﻦ...

Шӯхӣ

2017-04-29

Мусофирон ҳамин ки аз марзи Фориш мебароянду ба хоки Нурато дохил мешаванд, аз мағзи ҷон оҳи сабук кашида, “Худоё шукр” мегӯянд. Охир, аз роҳи пур аз дастандозу хӯрдашуда раҳоӣ ёфта, ба роҳи мумфарши софу равон баромадан чӣ қадар сафо дорад! Кас аз бардорузанҳо халос мешавад, осуда нафас мекашад, дилу ҷигараш ба ҷояш меояд...

Боре Дарвеш бо шӯхӣ ҳарфе мезанаду ба ғазаби чанд марди масти нуратоӣ дучор мешавад. Онҳо ӯро пеши роҳ гирифта пурсиш мекунанд:

- Ту гуфтӣ, роҳҳои Фориш беҳамтост?

- Оре, ман гуфтам, - беғубор ҷавоб медиҳад Дарвеш.

- Ту гуфтӣ, роҳҳои Нурато ба дард намехӯрад?

- Оре, ман гуфтам.

Мардҳои маст ба хурӯш омада дандон мефишоранд:

- Эй марди ҳисобӣ, агар роҳро аз роҳ фарқ накунӣ, чаро гапи беҳуда мезанӣ? Ё аз ҷонат сер шудӣ?

- Ман гапи беҳуда назадаам, бародарон! – тааҷҷуби муштзӯронро афзуда мегӯяд Дарвеш. – Бо мошин ки меравед, дар роҳи Фориш ҳамеша бояд ҳушёру бедор бошед, аммо роҳи Нурато доимо хоби касро меоварад. Пас, бигӯед, кадоме беҳтар аст?!

3.Ҳикмат

2017-04-24

Фарзанди кунҷков аз Дарвеш пурсид:

- Падар, чӣ сирре ҳаст, ки одам калон мешавад?

- Калон шудани одам сирре надорад, лекин камон шудани ӯ пур аз асрор аст! – ҷавоб дод Дарвеш.

***

2.ҳикмат

2017-04-24

***

Зани дувуми Дарвеш ҳар қадар меҳрубонӣ мекарду дастёрӣ, аммо боз медид, шавҳараш пайваста бо ёди зани аввал аст. Дар ниҳоят, косаи сабраш лабрез шуду бо дилсардӣ пурсид:

- Рости гапро гӯй, ӯ бештар ғамхорӣ мекард ё ман?

- Ӯ меҳрубонтар буд, - ҷавоб дод Дарвеш.

Зан ба шигифт омад, бе истиҳола дубора суол кард:

- Ӯ чӣ коре анҷом медод, ки ман наметавонам?

Дарвеш бо тааммул афзуд:

- Дар муқобили ту се кори ӯ аз сидқи дил буд. Нахуст, ҳар рӯз аз ман пештар бедор мешуд ва бароям оби таҳорат дуруст мекард. Дигар, чеҳраи ӯ ҳамеша бозу шукуфон буд, аз дидаҳояш пайваста нури муҳаббат меборид. Гузашта аз ин, пушти сар маро бузург мехонд ва аз пайи ӯ фарзандон дар симои ман инсони комилро медиданд...

***

ҳикмат

2017-04-24

***

Ҷавоне дар ниҳояти мастӣ ба ҳама дод мезад, арбада мекард. Дарвеш ин ҳолро дида гуфт:

- Эй ҷавон, боз мастию девона! Агар ба ёди мардум набошӣ, ҳадди ақал Худоро фикр кун. Беимонӣ ҳам ҳадде дорад!

- Домулло, маро нагӯй беимон! Худо дар дили ман аст, агар маст ҳам бошам, ӯ маро мефаҳмад.

- Не, бародар, Худо дар дили ту нест, ту дар дасти Худо ҳастӣ. Ҳамчунин коре макун, ки ба ғазаби вай гирифтор шавӣ!

***

Ҳикматҳои Дарвеш

2017-04-24

ОҒОЗИ СУХАН

Чӣ касе Дарвеш аст?

Саъдӣ (“Гулистон”): “Зоҳири дарвешӣ ҷомаи жанда асту мӯйи сутурда* ва ҳақиқати он – дили зинда ва нафси мурда”.

Абӯсаид Абулхайр (“Асрор-ут-тавҳид”): “Дарвешон на эшонанд. Агар эшон эшон будандӣ, на дарвешон будандӣ. Исми эшон сифати эшон аст. Ҳар ки ба ҳақ роҳ талабад, гузараш ба дарвешон бояд кард, ки дар вай эшонанд”.

Хоҷа Абдуллоҳи Ансорӣ (“Чиҳил калом ва сӣ паём”): “Қавме, ки аз бешаи ҳасад ҳаргиз хоре ба домани эшон наёвехт, аз биёбони нафс ҳаргиз ғуборе бар гӯшаи ридои** исломи эшон нанишаст ва аз ҳовияи ҳавӣ*** ҳаргиз дуде ба дидаи эшон нарасид. Салотини роҳанд дар либоси дарвешон, малакисифатанд ба сурати одамиён ва равандагон дар роҳи хеш хиромон”.

Аз Боязиди Бастомӣ пурсиданд: “Дарвешӣ чист?”. Гуфт: “Он ки касеро дар кунҷи дили хеш пой ба ганҷе фуру шавад ва дар он ганҷ гавҳаре ёбад, онро муҳаббат гӯянд, ҳар ки он гавҳар ёфт, ӯ – дарвеш”.

Доктор Ҷаводи Нурбахш: “Дар мактаби тасаввуфи суннатӣ дарвеш ба касе гуфта мешавад, ки ба ростӣ бе хеш ва бе ҳастӣ бошад, ба коинот эътино накунад ва ҷуз ба дӯст таваҷҷӯҳ надошта бошад... Дарси аввали дарвешӣ дӯст доштани халқи Худо ва эҳтиром гузордан ба ақоиди онҳост бо ёдоварӣ, ки дарвеш набояд фузули мардум ва муфаттиши ақоиду афкори дигарон бошад... Сӯфӣ бояд ба ҳама одамҳо самимона ишқ биварзад ва аз рӯйи дилу ҷон ва бидуни таваққуи**** подош ба ҷомиаи башарият хидмат кунад”.

________________

* - сутурда – тарошида;

** - ридо – болопӯш, ҷома;

*** - ҳовияи ҳавӣ – ҷаҳаннам, дӯзах;

**** - таваққуъ – умедворӣ, чашм доштан.

Арӯсии Беҳрӯз

2016-05-27

Дар торихи 22-юми май (соли 2016) писарам Беҳрӯз бо духтараке аз деҳаи Эҷ (зодгоҳи худам) ба исми Мухлиса хонадор шуд. Ҳама маросими мардумӣ, аз ҷумла, хостгорӣ, сарбанд, ноншиканон, мубораки дуздию мубораки калон, ақди никоҳи қонунӣ, тӯйбарӣ, базми духтарон, никоҳи мусалмонӣ, гардиш дар ҷойҳои муқаддасу диданӣ, қабули арӯс дар хонаи падарии домод, куштии занон, базми арӯсии густурда, домодсалому сунҳорсаломро дар ниҳояти хурсандиву шодмонӣ баргузор кардем. Ин чанд рӯзи гузашта аз банда шодонтар касе набуд, ба назарам...

Ҷашни тоҷикон дар Ӯхм

2016-05-05

2-юми майи соли 2016, дар яке аз калонтарин рустоҳои кӯҳистони Нурато, дар деҳаи Ӯхм аз сӯйи Маркази миллии тоҷикони вилояти Дизахт ва ноҳиядории Фориш як гирдиҳамойии ҷаззоб ба муносибати 25-умин солгарди истиқлоли кишвар баргузор гардид. Дар ин нишаст, гузашта аз сокинони деҳа ва рустоҳои атроф, ҳамчунин намояндагони устондории Дизахту ноҳиядории Фориш ва шоирону адибон аз Тошканд, Сирдарё, Бухоро ширкат варзиданд. Меҳмононро дар оғози барнома Абдукарим Шарипов – раиси Маркази тоҷикони Дизахт, ки мубтакири асосии ин гирдиҳамойӣ буд, муаррифӣ кард ва ҳокими ноҳияи Фориш сухани муқаддимавӣ гуфт. Барномаи гирдиҳамойӣ ранг ба ранг, минҷумла, иборат аз ибрози сухану умедвориҳои нек, саҳнаоройӣ ва шеъру овозхонии хонандагони мактабу колеҷи Ӯхм, баромади адибону шоирон ва аҳли ҳунар ва намоиши намунаҳои ҳунармандии миллии шаш маркази миллии вилояти Дизахт (тоҷик, қазоқ, рус, қирғиз, карис, туркман) буд

Бузургдошти Шайх Баҳоӣ

2016-04-22

Шайх Баҳоӣ

Имрӯз рӯзи бузургдошти Муҳаммад бинни Ҳусайн бинни Абдуссамад Ҳорисӣ, маъруф ба Шайх Баҳоӣ аст. Бино ба гуфтаю навиштаҳо, ӯ дар соли 953 ҳиҷрии қамарӣ (1546 милодӣ) дар шаҳри Баълабаки Лубнон ба дунё омад. Дар даврони кӯдакӣ ҳамроҳи падар ба Эрон сафар намуд. Дар замони шоҳ Таҳмоспи аввал ба Ифаҳон ворид шуд. Бо таҳсили улуми мухталиф машғул шуда, дар муддати кӯтоҳе ба мақбулияти ом даст ёфт ва мегӯянд, худи Шоҳаббоси Сафавӣ ба ӯ эҳтиром мегузошт.

Шайх Баҳоӣ пас аз Шайх Алӣ Муншор – падари ҳамсараш, мансаби шайхулисломии давлати Сафавиро ӯҳдадор шуд ва бо истифода аз ин мансаб саҳми босазое дар пешрафти илмҳои замони худ гузошт.

Шайх Баҳоӣ дар тӯли умри худ борҳо сафар кардааст, минҷумла, бо баҳонаи ҳаҷ ба кишварҳои Ироқ, Шом, Миср рафтааст. Дар фунуни фалсафа, мантиқ, ҳайат ва риёзиёт табаҳҳур дошт ва яке аз орифони барҷастаи замони худ буд. Аз худ ашъор боқӣ гузоштааст. Девони маснавии ӯ ба сабки Мавлоност ва ғазалиёташ шабоҳати бисёр ба ғазалиёти Ҳофиз дорад.

Бо назари муҳандисӣ дуруст ва саҳеҳ тақсим намудани оби Зояндарӯд ба маҳалҳо, сохтани масҷиди Чаҳорбоғи Исфаҳон бар рӯйи лаҷанзор (ҷойи ботлоқӣ), сохтани гармоба бо корбурди шамъи худкор аз ҷумлаи шоҳкориҳои анҷомдодаи Шайх Баҳоӣ аст.

Шайх Баҳоӣ соли 1031 ҳиҷрии қамарӣ (1621 милодӣ) дар Исфаҳон даргузашт ва бино ба васияти худаш, ҷанозаи ӯро ба Машҳад бурданд ва дар канори музейи Остони Қудс дафн карданд.

Дунё, ки аз ӯ дили асирон реш аст,

Помоли ғамаш тавонгару дарвеш аст.

Нешаш ҳама ҷонгазотар аз шарбати марг,

Нӯшаш, чу накӯ нигаҳ кунӣ, ҳам неш аст.

Бузургдошти Саъдӣ

2016-04-21

Ҳар сол 20-уми моҳи апрел ба унвони Рӯзи бузургдошти Саъдӣ дар саросари Эрон таҷлил мешавад. Ин лаҳза Шайхи аҷал(л)-ро ёдовар шудаму яке аз шеърҳои ноби ӯ вирди забон омад:

Гили хушбӯй дар ҳаммом рӯзе,

Расид аз дасти маҳбубе ба дастам.

Бад-ӯ гуфтам, ки мушкӣ ё абирӣ,

Ки аз бӯйи диловези ту мастам?

Бигуфто, ман гиле ночиз будам,

Валекин муддате бо гул нишастам.

Камоли ҳамнишин дар ман асар кард,

Вагарна, ман ҳамон хокам, ки ҳастам.

Дар боби “Сафарнома”-и вебсайти камина ёддоштҳои ҷолибе дар хусуси Шерози куҳантаъриху “Саъдия”-и биҳиштосо омадааст...

номҳои қадим дар Эҷ

2014-01-26

Вожаҳои зер аз ҷумлаи қадимитарин асомӣ дар атрофу акнофи деҳаи Эҷ мебошанд:

Феҷак (fejak, дара), Пашкан(pashkan, зов), Хадрӯд(khadrud, дара), Зеҳнок(zehnok, дара), Пишох(pishokh, дара), Доничак(donichak, гузар), Пирвеш(pirvesh, дара), Эрич(erich, дара), Пашметан(pashmetan, кӯҳ)

маънии "эч" (ej)

2014-01-26

"Эҷ"(ej) дар асл "эг" (талаффузи форсиаш "иг") будааст. Баъд аз тасаллути арабхо "эҷ"(ej) хонда ва навишта шудааст. Маъниаш: калъа(kal'a), диж, истеҳком

Маънии

2012-03-08

Сегодня наш сайт создан и постепенно будет пополняться полезной информацией.